بقى صعب تميّز الولاد من بعض.
كلهم بقوا لابسين نفس الـ Oversized (الواسع أوي اللي شكله سرق هدوم أبوه)
ونفس البنطلون الواسع الساقط .. اللي بيقع من الوسط
وماسك IQOS زي ما يكون عنده ١٣ شركة بيديرها في البورصه
بس مش موضوعنا دلوقتي…
خلينا دلوقتي في قصة الشعر.
موليت – Mullet،
جيل كامل بيحلق نفس الرأس،
ويقولك: “ده بيعبر عني!”
يعني إزاي يا نجم وإنت واخد كوبي بيست من راس صاحبك؟
المشكلة مش إنك بتقلد…
المشكلة إنك مش عارف بتقلد مين؟
ديفيد بوي – David Bowie
مغني عايش في الولايات المتحده و داعم للعنصريه
شايف إن زنا المحارم حرية،
وإن دعم الشذوذ تنوير،
وإن الدين مجرد تريند قديم لازم يتلغى.
دور ورايا و راجع يمكن اكون ظالمه و يطلع بيبيع سبح و أنا معرفش 
ودلوقتي؟
قصة شعره اللي بقت “ستايل”
بتتمشى وسطنا كأنها موضة بريئة…
من غير ما حد يسأل:
هو ده فعلاً بيعبر عني؟ ولا بيشوّهني؟
وأول ما تتكلم، ييجي الرد الأوتوماتيك:
“أنا مش قصدي حاجة..عاجبني الشكل بس.”
طب ماشي…
كلنا كنا بنحب قوس قزح 
،
بس لما بقى رمز لفئة مش بتمثلنا،
بطّلنا نلبسه!
مش علشان الألوان وحشة…
بس علشان المعنى اتلوّث 
بس دلوقتي بعد ما عرفت… هتعمل إيه؟
لسه مصمم تقول “عاجبني الشكل”؟
ولا بدأت تفهم إن في حاجات بتتسرسب جواك من غير ما تحس..
وإن شخصيتك وسلوكك بيتشكّلوا على مزاج غيرك؟!
يمكن المدرس اللي وقف على باب المدرسة بماكينة الحلاقة 
ماكانش متعصب ولا عايز يهين حد
يمكن كان بيحاول يحميك من حاجة أكبر..
بس المشكلة إن المجتمع بيهاجم اللي ظاهر فيه الشدة،
وبيسكت عن اللي لابس وش البراءة وهو بيدس السم في العسل 
أنا مش بتدخل في شكلك
ولا بقولك تعمل إيه…
أنا بس بقدملك معلومة 
تاخدها زي ما هي
وتقيس بيها حاجات كتير لسه هتقابلك في حياتك.
عارف إن الكلام ده مش هيغيّر الدنيا
بس لازم يتقال.
علشان في لحظة قدام…
لما كل حاجة تتقلب
يبقى الزمن فاكر
إني قلت و بسجل اعتراضي و عارف اني مش هغير حاجة ده امر واقع … خدوا بالكم علي عيالكم
لا تعليق